Kona marsmánaðar hjá Tengslanet austfirskra kvenna (TAK)  er Þórunn Guðgeirsdóttir fótaaðgerðafræðingur.  Kona mánaðarins hjá TAK er valin er af handahófi hverju sinni úr félagaskrá.

Við hvað starfar þú? Ég vinn á fótaaðgerðastofunni Fótatak og stunda kennaranám við menntavísindasvið Háskóla Íslands.

Hver er menntun þín?  Stúdentspróf, snyrtifræðimeistari og fótaaðgerðafræðingur.

Hvað skiptir mestu máli í þínu lífi? Fjölskyldan og heilsan.

Hvað finnst þér skemmtilegast að gera?  Það er svo margt, til dæmis gera eitthvað skemmtilegt með fjölskyldunni, borða góðan mat í góðra vina hópi. Stunda líkamsrækt og ýmisskonar áhugamál s.s. ræktun. Horfa á mynd eða lesa góða bók þegar tími gefst.

Hver er uppáhaldsstaðurinn þinn á Austurlandi?  Þessi er erfið mér finnst alltaf gott að koma í Hallormsstað og Atlavík. Selskógur kemur einnig upp í hugann.

Hvað málefni á að setja í forgang á Austurlandi? Ja, hvar á ég að byrja. Samgöngumál innan fjórðungsins og við aðra landshluta. Mennta- og atvinnumál. Við þurfum að haga málum þannig að það sé eftirsóknarvert að setjast að hjá okkur og við eigum að standa saman innan fjórðungsins og líta á hann sem eina heild, þannig verður samfélag okkar betra. Fólk sem vill eiga hér heima þarf líka að geta fengið húsnæði.

Hvaða bók er á náttborðinu hjá þér?  Mundu mig, ég man þig e. Dorothy Koomson.

Hvað vilt þú sjá á dagskránni hjá TAK?  Fræðslu ýmisskonar og skipulagðar ferðir. Ég hef ekki verið dugleg að taka þátt í starfi TAK en hef farið í eina ferð með ykkur þar sem farið var í dagsferð til Reykjavíkur, Alþingi heimsótt, Kraum í Aðalstræti og fleiri staðir þetta var bæði fróðlegt, gagnlegt og mjög skemmtilegt.